+++ရေးထားမိတဲ့ Status များ+++

ကျွန်တော်လဲ မအားတာနဲ့ စာမရေးဖြစ်တာ တစ်ပတ်ကျော်ပြီ။ဒါပေမယ့် ဖတ်လို့ ရလာတဲ့ အသိလေး တစ်ခုအပေါ် ဖြန့်ကျက်စဉ်းစားပြီး  တစ်နေ့ကို စာတိုတစ်ကြောင်းလောက်တော့  ဖေ့စ်ဘွတ်မှာ ရေးဖြစ်ပါတယ်။ ခု အဲ့ဒါလေးတွေကို ခံစားချက်ကိုက်ညီတဲ့သူငယ်ချင်းတွေ အတွက် custom message လုပ်လို့ ရအောင် တင်ပေးလိုက်ပါတယ်။

1. မင်းမှ မဟုတ်ဘူး ငါလည်း ဓါးရှရင် နာတတ်တယ်ဟ။ အရင်လို ထုံဆေး မထိုးထားမိဘူးလေ.......27.10.12(12.42PM)
   
2. ငါပြောဘူးတဲ့ စကား "လိမ္မာရင် မင်းအတွက်ကြီးပဲ" ဆိုတာကို မင်းလျစ်လျူရှုလိုက်ပြီနော်.....အဲ့ဒီတော့????? 28.10.12(073း2PM)
   
3. အချစ်ရည်ကို ကြိမ်ဖန်များစွာ သောက်သုံးသူနှင့် သောက်သုံးခြင်းခံရသူတို့သည် အချစ်၏နက်ရှိုင်းသော အရာသာအား မခံစားတတ်တော့ချေ။....1.11.12(07း48PM)
   
4. မတည်မြဲတဲ့ လောကကြီးမှာ မွေးဖွားခြင်းရှိလို့ သေဆုံးခြင်းရှိတယ်။ ဒါဆို ချစ်ခြင်းမှာရော မုန်းခြင်းရှိနေမလား??????.....01.11.12(08း22PM)
   
5. ဆန်ဒီ...နင်ပြောတော့ လေပြေလေညှင်းလေးသာ ဆိုတယ် ဒီမှာတော့ ဗလောင်ဆူ၊ သောင်ထူသွားတယ်ဟ........(နယူးယောက်ခ်မြို့ ဆန်ဒီမုန်တိုင်းအားအမှတ်တရ တင်စားထားသည်။).....03.11.12(02း27AM)
   
6. ....အမေတစ်ယောက်ရဲ့အလိုမကျသံ....မွေးကတည်းက (ဒီတိုင်း)ထူးပါမလာတဲ့ ညည်းတို့က လူစစ်ကြောင်း အရမ်းလစ်ဟာချင်နေတာ ငါတို့ဖြစ် လိုက်မမှီတော့ပါဘူးအေ.....03.11.12(02:57AM)
   
7. မင်းမမှားပါဘူး။ ကွေ့ကောက် စီးဆင်းနေတဲ့မြစ်ကို ဖြောင့်လာနိုးနဲ့ ရူးမိုက်စွာအလျားလိုက် တံတားထိုးကြည့်မိတဲ့ င့ါကိုက မှားတာ.......06.11.12(03း01PM)

ဝတ္တုတိုရေးရင် ထည့်ရေးဖို့ စဉ်းစားထားတဲ့ စကားစုလေးတွေပါ။ ကြိုက်နှစ်သက်တဲ့ သူငယ်ချင်းတွေ လွတ်လပ်စွာ အသုံးပြုနိုင်ပါတယ်။။။။။။။။။။။။
စာပေချစ်သူများကို လေးစားခင်မင်လျှက်
***မင်းနေ***

+++ကြီးထွားမှု+++

ကတောက်...... ငါ့အချစ်တွေ
သေပြီထင်လို့ မြေသြဇာရနိုးနဲ့ မြေမြုပ်မိပါတယ်.......
ခုတော့ ဆက်လက်ရှင်သန် ကြီးထွားနေလိုက်တာများ
အပင်တွေသေ၊ အောက်စီဂျင်ပျက်လို့
သတ္တဝါတွေအတွက် ကပ်ဆိုက်တော့မယ် အခြေအနေ........
ဒီလိုမှန်းသိ အစတည်းက မီးလောင်တိုက်သွင်းပြစ်တယ်~~~~~~~~~~
(မဆီမဆိုင် သင်ခန်းစာယူမိပါရဲ့ သင်္ဂြိုဟ်နည်း သုံးမျိုး ကျေညက်အောင် လေ့လာဖို့ပေါ့။)
***မင်းနေ***
24.11.12(02:11PM)

+++ရှားပါလားတဲ့ တို့ယောက်ျားတွေ+++

သူငယ်ချင်းအားလုံး မင်္ဂလာပါနော်။ ကျွန်တော့်ရဲ့ အကျင့်အတိုင်း အတွေးတစ်ခုရတိုင်း ဖေ့စ်ဘွတ်မှာ စာတို တစ်ကြောင်းရေးတတ်ပါတယ်။ခု STATUS လေးကိုဖေ့စ်ဘွတ်မှာ 07ရက်နေ့က ရေးထားတာပါ။...မနေ့ကရေးတဲ့ ဝတ္တုတို(မယှဉ်ဝံ့တဲ့ အညတရ ခရေ)ထဲက ဇာက်ကောင်မင်းနေ ဘက်က ဖြစ်တတ်တဲ့သဘောလေးနဲ့ တိုက်ဆိုင်နေလို့ ရှားပါလာတဲ့ ကျွန်တော်တို့ ယောက်ျားတွေအစား တင်ပေးလိုက်ရပါကြောင်း ဟိဟိ (ဟာသအမြင်ဖြင့် ဖတ်ရှုပေးပါရန်)

မိန်းကလေး(မ)တွ ကိုယ်မချစ်တဲ့လူကို ငြင်းရတာလွယ်သလောက် ယောက်ျားလေး(ကျား)တွေမှာတော့ တယ်ခက်သကိုးးးးးးးးးးးးးး :D
(၁)စဉ်းစားအုံးမယ်လို့ ပြောရင် ယောက်ျားလေးဆိုတော့ အဆင်မပြေဘူးဗျ....
(၂)မချစ်ဘူး ဆိုတော့လည်း သူ့သိက္ခာကရှိသေးတယ်...သက်ညှာစွာဖြင့် ထည့်တွက်ပေးရအုံးမယ်။
(၃)ရှောင်ပြေးတော့လည်း မာနကြီးတယ် ယောက်ျားရောဟုတ်ရဲ့လား?ဘာသားနဲ့ထုထားတာလဲဖြစ်အုံးမယ်....
(၄)ဘာမှမပြောပဲ ငြိမ်ငြိမ်လေးနေတော့လဲ ယောက်ျားတန်မဲ့ မျှော်လင့်ချက်ပေးနေတယ် ပြောခံထိမယ်....
ဟူးးးးးးးးးးး နာတို့ ယောက်ျားတွေဘဝက တယ်မလွယ်ပါလားနော် :P
ခုပဲ ကြည့်လေ...ဖတ်ကြည့်မိတဲ့ အပျိုငယ်တွေနဲ့ အပျိုကြီးတွေက မန့် မသွားတောင် စိတ်ထဲကနေ "အမလေး ကြီးကျယ်လိုက်တာ"လို့ ပြောသွားအုံးမယ်...:P အော် မိန်းကလေးတွေ မိန်းကလေးတွေ ဟိဟိ

(အပျော် သက်သက်မျှသာ)
သူငယ်ချင်းများကို လေးစားခင်မင်လျှက်
***မင်းနေ***
07.11.12(08:08 PM)

*****မယှဉ်ဝံ့တဲ့ အညတရ ခရေ*****

ထိုနေ့ကို ခရေ ဘယ်တော့မှ မေ့မည်မဟုတ်ပါ။  သူနဲ့ ဆုံခဲ့တဲ့နေ့တည်းက တွေ့တွေ့ချင်း ကိုကိုလို့ ခေါ်ခဲ့မိတာ မှတ်မိသေးသည်။အသက်က ငါးနှစ်လောက်ကွာသည်။ ခရေက အိမ်မှာ အငယ်ဆုံး၊ အစ်ကို လိုချင်သူဆိုတော့ ပြည့်စုံသွားသလိုဖြစ်ခဲ့သည်။ ခရေတို့အိမ်နဲ့ ၅မိနစ်လောက် စက်ဘီးစီးလျှင် ညဈေးတန်းသို့ ရောက်သည်။ခရေက ညနေခင်း ဝက်သားဒုတ်ထိုးစားချင်စိတ်ပေါက်လျှင် ညဈေးတန်းကို ရောက်နေကြဖြစ်သည်။နာမည်ငါးလုံးပိုင်ဆိုင်သော ပြင်ဦးလွင်မြို့သည် တောင်ပေါ်မြို့လေးဖြစ်သည့် အလျှောက် ညနေခင်းအချိန် အရမ်းသာယာသည်။ နာရီစဉ်အနီး လမ်းသွယ်လေးရှိ၏။ အနိမ့်အမြင့်ရှိသော ထိုလမ်းသွယ် အလယ်တွင် ဆိုင်ခန်းငယ်များ ကျောချင်းကပ်၍ အမြင့်လမ်းထိပ်မှ အနိမ့် လမ်းဆုံ မီးသတ်ရုံနား မရောက်ခင်ထိ ဖွင့်ထားကြသည်။ ထိုညဈေးတန်းတွင် ကော်ပြန့်မျိုးစုံရသည် ခေါက်ဆွဲသုတ်၊ကြာဇံသုတ်မှ အစ မြေအိုးမြည်းရှည်၊မာလာဟင်းထိ ရသည်။ ထိုထဲတွင် ခရေ အကြိုက်ဆုံးနှင့် အစားဖြစ်ဆုံးမှာ ဝက်သားဒုတ်ထိုးဖြစ်သည်။ ပြီးလျှင် ဆီကြော်(ပဲနှင့်)၊အထပ်တစ်ရာကို အပြန် ပါဆယ်ဆွဲလေ့ရှိသည်။ လမ်းလယ်တွင် ဆိုင်နှစ်တန်းကျောချင်းကပ် ဖွင့်ထားသည့်အတွက် တစ်ဖက်တစ်ချက် လူသွားလမ်းကျဉ်လှသည်။ အဲ့နေ့က ခရေ ညဈေးတန်းမှာ မုန့်စားအပြီး ပါဆယ်မုန့်များယူကာ စက်ဘီးရှိရာသို့  အကူးတွင်

"ကျွီးးးးးးးးးးးး ဘုတ် "ဆိုင်ကယ် အရေးပေါ် ဘရိတ်အုပ်သံကြားလိုက်ရသည်။

"အမေ့.... " ဆိုင်ကယ်တစ်စီး ပြေးဝင်လာတာကို ခဏတာ တွေ့လိုက်ချိန် မျက်စိ စုံမှိတ်ပြီး အမေ ကို တလိုက်မိသည်။ ဘာမှ မဖြစ်မှ ဖြည်းဖြည်းချင်း ဖွင့်ကြည့်လိုက်တော့ လူတစ်ယောက် ပြုံပြီးကြည့်နေတာ တွေ့လိုက်ရသည်။ သူ့ရဲ့ နှစ်လိုဖွယ်အပြုံးတွေက အရမ်းကြည့်လို့ ကောင်းလှ၏။ သူ့အား အလန့်တကြားဖြစ်စေသူကို စိတ်တို၊စိတ်ရှုပ်ပုံမပြပဲ၊ လန့်သွားသူအား အပြုံးလေးဖြင့် အလန့်ကိုပြေစေခဲသည်။သူ့ပုံစံက တည်ကြည်သည်၊ခန့်ညားသည် ကြင်နာခင်မင်တတ်ပုံရသည်။ အားပေးနှစ်သိမ့်မှုအပြုံးတွေကြား ခဏတာ နစ်မွှန်းနေခိုက်……..

"ဒီက ဘာဖြစ်သွားသေးလဲ မသိဘူး" အသံအနိမ့်အမြင့်မှန်ကန်စွာဖြင့် ရင့်ကျက်တည်ငြိမ်သော  မေးသံနှင့် အတူ ရှေ့ခြင်းထဲမှ ထွက်ကျသွားသော စာအုပ်တွေ ကုန်းကောက်နေသည်။

"ဟုတ်ကဲ့ ဘာမှမဖြစ်ပါဘူး ကိုကို...နည်းနည်း လန့်သွားယုံပါ.."

"ပြန် လို့ ရပါတယ်နော်"

"ဟုတ်ကဲ့ ရပါတယ် ကိုကို" အပြန် စက်ဘီးစီးနေချိန် ကိုကိုလို့ ခေါ်လိုက်မိတာကို ပြန်တွေးရင်းရှက်နေမိသည်။ သို့ပေမယ့် ကိုကို့အပြုံးတွေကတော့ စိုးမိုးထားဆဲ........

ဒီလိုနှင့် ခရေတို့ မတွေ့ဖြစ်တာ ၁လ လောက်ကြာသွားလေသည်။ တစ်ရက် ကံကြမ္မာက မျက်နသာပေးတာလား၊ တွေ့ကံပါလာတာလား မပြောတတ်။ အော်ဇီ ရောက်နေတဲ့အစ်မဆီ နိုင်ငံခြားဖုန်းခေါ်ဖို့အတွက် ခရေ အင်တာနက်ဆိုင်သို့ ရောက်လာခဲ့သည်။ ဆိုင်ထဲသို့ လိုက်ကာ ဖွင့်အဝင် လူတစ်ယောက်နှင့် တိုးမိသည်။ အမြဲတမ်း ပြာတိပြာယာဖြစ်နေတဲ့ ခရေဟာ လိုက်ကာကို ဆက်ခနဲဖွင့်ပြီး အထဲတိုးဝင်လိုက်ခြင်း ဖြစ်သည်။

"အင့်...." လူတစ်ယောက်ရဲ့ ရင်ဘက်ကို ခေါင်းနှင့် ဝင်ဆောင့်မိလိုက်သည်။ ယောက်ျားလေး တစ်ယောက်နဲ့ မထိတွေ့ဖူးတော့ စိတ်ထဲ ရှိန်းတိန်းတိန်းဖြစ်သွားမိသည်။ ကိုယ်သင်းရနံ့လေးက မွှေးလို့နေသည်။သန့်ရှင်းသက်ရပ်စွာ နေတတ်သူဟု စိတ်ထဲ ကောက်ချက်ချမိသည်။ ရှက်ရှက်နဲ့ မော့ ကြည့်လိုက်တော့ သူပါပဲ။ ကိုကိုရဲ့ အမူအရာအတိုင်း ပြုံးပြီးကြည့်နေသည်။

"ဟိုတစ်ခါ တွေ့ဘူးတဲ့ သူမဟုတ်လား"

"ဟုတ်ကဲ့ ကိုကို...ဆောရီးပါနော် အမြန်ဝင်လိုက်လို့ "ရှက်ရှက်နှင့် ပြန်ပြောလိုက်မိသည်။

"အင်း ရပါတယ်ကွ..မင်းကြည့်ရတာ စိတ်လောနေပုံပဲ"

"ဟုတ်ကဲ့ မလေးဆီကို ဖုန်းဆက်ရအောင် လာတာပါ"

"အော်...အင်း ကိုလဲ စာပေဟောပြောပွဲ အသံဖိုင်တွေ လာဒေါင်းတာ...မင်းလုပ်စရာရှိရင်လုပ်လေ.. နောက်တစ်ခါ သတိထားပြီး ဝင်နော်"

"ဟုတ်ကဲ့..." နှုတ်ဆက်ပြီး အေးဆေး တည်ငြိမ်စွာ ထွက်သွားလေသည်။

မလေးဆီ ဖုန်းဆက်ပြီး အမေမှာလိုက်သည့် နွားနို့ ဝယ်ရယ် အတွက် December (နွားနို့အထူးရသည့်) အအေး ဆိုင်သို့ ရောက်လာခဲ့သည်။ ထိုချိန် ဆိုင်မျက်နှာစာ မှန်မှ တစ်ဆင့် အပြင်သို့ ကြည့်ပြီး နို့အေး သောက်နေသော ကိုကို့ကိုထပ်မံတွေ့ရပြန်သည်။

"အအေးလာသောက်တာလား.."

"ဟုတ်ကဲ့ ကိုကို " မေမေ့အတွက် လာဝယ်တာကို နှုတ်ကထွက်သွားတော့ တခြား၊ အရင်က ဆိုင်ထိုင်သောက်လေ့မရှိတဲ့နွားနို့ ခုမှ သောက်ချင်လာမိသည်။

"'ဒါနဲ့ မင်းနာမည်က.."

"ပန်းခရေပါ သူငယ်ချင်းတွေကတော့ ခရေလို့ ခေါ်ကြတယ်"

"ဟား ဟုတ်လား လူအတိုင်းမှည့်တတ်ပါ့"

"ဟင် ဘာလို့လဲ..လူက ဆိုးလို့လား"

"မဟုတ်ရပါဘူးဗျာ ချောပါတယ်.."

"တကယ်လား..."

"အင်း....ချောတယ်ဆိုတာ မွန်ဘာသာ (ချိုတ်)က လာတာ အသံထွက်တော့ (ချော)တဲ့ အဓိပ္ပါယ်ကတော့ (သေသည်)တဲ့ "

"ဟင် အကောင်းမှတ်လို့ နားထောင်နေတာ.."ကိုကိုက အဲ့လိုလူတစ်ယောက် တစ်ခါတစ်လေ ရုပ်တည်နဲ့ နောက်တတ်သေးသည်။

"အစ်ကိုနာမည်ကရောဘယ်လိုခေါ်လဲ... ခရေက နာမည်မသိလို့ ကိုကိုလို့ ခေါ်မိနေတာ"

"အင်းပါ ရပါတယ်ကွ ချာတိတ်ရ...ကိုယ့်နာမည်က မင်းနေပါ...မင်းကြိုက်သလိုခေါ်နိုင်ပါတယ်နော်" ပြုံးပြီးပြောလိုက်အမူအရာလေးက တစ်မျိုးလေးကြည့်လို့ ကောင်းနေသည်။

"ဟုတ်ကဲ့ ကိုကို ကျေးဇူးပါ... "

"ချာတိတ် အယ်...ပန်းခရေ"

"ကိုကို အဆင်ပြေသလိုခေါ်ပါ ရပါတယ်.."

"ဒါဆို မင်းကို ဘယ်လိုခေါ်ရင်ကောင်းမလဲ ဆိုတော့...မင်းနဲ့ တွေ့လိုက်တိုင်း အမြဲ ပြာယာခက်နေသလိုပဲ.. အဲ့တော့ ယာလေး လို့ ခေါ်မယ်...ဘယ်လိုသဘောရလဲ"

"ဟုတ်ကဲ့ ကိုကို..ကောင်းသားပဲ" အဲ့ဒီနေ့မှာပဲ ခရေနဲ့ ကိုကိုဟာ ငယ်သူငယ်ချင်းတွေလို အရမ်းခင်သွားကြတယ်။ နောက်ပိုင်း အိမ်မှာနေရတာ ပျင်းတိုင်း ကိုကိုနေတဲ့ အဆောင်ကို သွားလည်ဖြစ်တယ်။ ခရေ သိလိုတာ တွေကိုလဲ မငြီးမငြူရှင်းပြတတ်တယ်။ ပုရွက်ဆိတ်တစ်ကောင် ထမင်းလုံးချည်သွားတာ တွေ့လိုက်တဲ့အချိန်………..

"ကိုကို ပုရွက်ဆိတ်က အကောင်သေးသလောက် သယ်နိုင်တယ်နော်"

"အင်း ဟုတ်တယ် ယာလေးရဲ့ ပုရွက်ဆိတ်တစ်ကောင်ဟာ သူ့အရွယ်ထက် အဆ ၅၀ကို သယ်နိုင်တယ်လို့ ဆွစ်လူမျိုး စိတ်ပညာရှင် သြဂတ်ဖောရယ်က ၇၅နှစ်လေ့လာခဲ့တာ...."

"အော် ထူးစမ်းတယ်နော်....ဒါနဲ့ ကိုကို ကမ္ဘာကြီးက အလုံးလားဟင်"

"မဟုတ်ဘူး ဘဲဥပုံသဏ္ဍာန်ပါ...ဘာလို့လဲ ဆိုတော့ တောင်နဲ့မြောက်က ၇၉၂၇မိုင် အရှေ့နဲ့အနောက်က ၇၉၀၀မိုင် ဖြစ်ပြီးတော့ ၂၂ဒီဂရီနဲ့ ၂၆ ဒီဂရီကြားမှာ လည်နေတာလေ"

"အော် အဲ့ပေါ်ကို အာဒံနဲ့ ဧဝ စရောက်တာပေါ့နော်"

"အင်း အာဒံရဲ့ နံရိုးတစ်ချောင်းနဲ့ ဧဝကို ဖန်တီးတယ်လို့တော့ ဖတ်ဖူးတယ်။ ဒါပေမယ့် ချားလ်ဒါဝင်ရဲ့ အီဗောလူးရှင်းသီအိုရီမှာ လူက မြောက်က ဆင်းသတ်တာလို့ ဘာသာရေးကိုအကြီးအကျယ်

ဆန့်ကျင်ပြီးတော့ အတိအလင်းပြောထားတာ….။ "

"အော် ကိုကိုက တော်တော်သိတာပဲ...."

"အင်း သိအောင် စာဖတ်ရတာပေါ့ ယာလေးရ...ယာလေးရော စာဖတ် ဝါသနာပါလား"

"အင်း ခရေက ရုပ်ပြတွေ ကဗျာတွေပဲ ဖတ်တာများတယ် "

"အော် ကောင်းပါတယ် ယာလေး..စာဖတ်ရတာ ဝါသနာပါတယ်ဆိုတည်းက ချီးကျူးပါတယ်… ဘယ်စာအုပ်ပဲ ဖတ်ဖတ် အနှစ်သာရကို ရအောင် ယူတတ်ဖို့လိုတယ်။ ပြီး ပြီးရောမဖတ်ရဘူး။ ဆရာမောင်စိန်ဝင်း(ပုတီးကုန်း) ပြောဖူးတဲ့စကားရှိတယ်"

"ဟုတ်လား ဘာလဲ ကိုကို"

"စာအုပ်များများဖတ်စရာမလိုပဲ စဉ်းစားစရာများများပါတဲ့ စာအုပ်နည်းနည်းကို ဖတ်ပြီး များများစဉ်းစားတဲ့အလေ့အကျင့်ရအောင် လုပ်ပါတဲ့။ အဲ့လိုမဟုတ်ပဲ စာအုပ်များများဖတ်နေရင် ဗဟုသုတအများကြီးရှိတဲ့ မစဉ်းစားတတ်တဲ့လူဖြစ်တတ်တယ်တဲ့။"

"အင်း ဟုတ်တယ် ကိုကိုပြောမှ သတိထားမိတော့တယ်...နားလည်အောင် ပြောပြပေးလို့ ကျေးဇူးပါနော် ကိုကို"

"ဟား ရပါတယ်ယာလေး...ကိုယ့်အတွက် အပန်းမကြီးပါဘူး...မှောင်နေပြီ ယာလေး နောက်ကျနေအုံးမယ်" အဲ့လိုမျိုး ကိုကိုက တစ်ခါတစ်ရံမှာ လူကြီးတစ်ယောက်လို ပြောဆို ဆုံးမတတ်တယ်။

"ဟုတ်ကဲ့ ကိုကို...ယာလေး ပြန်တော့မယ်နော် တာ့တာ" ကိုကို့ကို နှုတ်ဆက်ပြီး အချိန်အရမသင့်တော်လို့ ပြန်လာခဲ့ရပေမယ့် စိတ်ထဲမှာပေါ့ ကိုကိုက အချိန်ပြည့် နေရာယူလွန်းနေတယ်။ ဒီလိုနဲ့ ကိုကို့ဆီ သွားလိုက်ပြန်လိုက် ကျောင်းတတ်လိုက်နဲ့ နေ့တွေ ဖြတ်သန်းလာလိုက်တာ အချိန်တွေ ဘယ်လိုကုန်မှန်းတောင် မသိလိုက်ဘူး။ဒီဇင်ဘာ ကျောင်းပိတ်တဲ့တစ်ရက် ကိုကို့အိမ်ရှေ့အရောက်.......

"ယာလေးပါလား လာလေ...."

"ဟုတ်ကဲ့ ကိုကို"အိမ်ရှေ့မှာ ကားတစ်စီးတွေ့တည်းက ဧည့်သည်ရောက်နေတယ်ဆိုတာ ရိပ်မိပြီး လှည့်ပြန်မလို့ပါပဲ။ဒါပေမယ့် လှေကားထစ်မှာတွေ့တဲ့ မိန်းမစီး ဖိနပ်တစ်ရံကြောင့် ရင်ထဲ နွမ်းလျှစွာနဲ့ သိချင်စိတ်တွေ များသွားရခြင်းပါ။

"ဒါက သဇင်တဲ့....ကိုကို့ရဲ့ ချစ်သူပေါ့"

"ဟင် အော် ဟုတ် ကိုကို"နားထဲကို သံရည်ပူလောင်းချခံလိုက်ရသလို အမှောင်ထုအခန်းထဲမှာ အဲကိုး သံတွေထွက်နေသလိုလို။ နားထဲမှာ ပူစပ်ပူလောင် အသံတွေအထပ်ထပ် ကြားယောင်ပြီး မျက်လုံးတွေ ပြာဝေသွားပါတော့တယ်။

"ဒီက ညီမလေးက ပန်းခရေလား မောင် ဖုန်းဆက်တိုင်း ပြောပြလို့ သိရပါတယ်။ အချောလေးပဲ ညီမက"

"ဟုတ်ကဲ့ မမ ကျေးဇူးပါ။ မမကို မမှီတာတော့သေချာပါတယ်။" သဝန်တိုမှုတွေ ရှိနေပေမယ့် စိတ်ကို အတတ်နိုင်ဆုံးထိန်းချုပ် ပြောလိုက်ရသည်။

"ကိုကို  ဧည့်သည်ချစ်သူရောက်နေတာဆိုတော့ ခရေပြန်တော့မယ်နော်...လွတ်လွတ်လပ်လပ် ပြောလို့ရတာပေါ့" ခနဲ့တဲ့ စကားလုံးတွေသုံးခဲ့ပေမယ့်  ကိုကို့ရဲ့ မျက်ဝန်းတွေမှာ သနားစိတ်၊ အားနာစိတ်တွေ ရှိနေတယ်ဆိုတာ ခရေ တွေ့လိုက်ရလို့ ရှာကျန်ပြီး ကျေနပ်မိနေတယ်။ ကိုကို အရမ်းကို ပါးနပ်စွာ နေတတ်ခဲ့တာပဲနော်။ ချစ်သူရှိတယ်ဆိုတာ မသိအောင်ကို အေးချမ်းတည်ငြိမ်စွာ နေပြပေးခဲ့တယ်။ ကိုကို ဟိုအရင်က ပြောခဲ့သလိုပါပဲလား......

"ကိုကို အချစ်ဆိုတာ ဘယ်လိုမျိုးလဲဟင်"

"အချစ်ဆိုတာ တကယ်တော့ ချစ်နေဖို့ပဲ လိုတာပါ ယာလေးရ။ အချစ်မှာ ရယူလိုစိတ်ဆိုတဲ့ အတ္တတွေနဲ့ချစ်ရင် လူကိုပင်ပန်းဆင်းရဲမှု၊ထိခိုက်ကြေကွဲမှုတွေ ခံစားရစေတယ်။ တကယ်တော့ အချစ်စစ်ဆိုတာ သံပတ်ပေးထားတဲ့ ကားတစ်စီးလို ရှူးရှူးဒိုင်းဒိုင်း အရှိန်နဲ့ထွက်သွားပြီး ရပ်သွားတဲ့ အရာမျိုးမဟုတ်ဘူးလေ။ ပုံမှန်ပဲ တစ်ယောက်နဲ့တစ်ယောက် နားလည်မှုတွေ အပြန်အလှန်နဲ့ သဝန်တို၊သံသယရှိခြင်းနည်းစွာ ပျော်ရွှင်ကြည်နူးနေရတာကိုက အချစ်ရဲ့ အရသာ။......"

"ဒါဆို ကိုယ့်ကို မချစ်တဲ့လူတစ်ယောက်ကို ချစ်မိနေရင်ရော"

"အင်း..အဲ့ပေါ်မှာ ကိုယ့်စိတ်ကိုရွှင်လန်း ကျေနပ်စေတယ်။ အဲ့လိုချစ်နေရမှ ပျော်စရာဖြစ်ပြီး ကြည့်နူးနေရတယ်ဆိုလဲ ဒါက အချစ်ပဲလေ။ ဒါပေမယ့် ဦးနှောက်နဲ့ နည်းနည်းထည့်စဉ်းစားပေါ့။ သူ့ကို ချစ်ရတာ အကန့်အသတ်တွေ ရှိနေတယ်ဆိုရင် အဲ့အချစ်ကို  ဆက်လက်ရှင်သန်ခွင့်မပေးတာ အကောင်းဆုံးပဲ။ ဘာလို့လဲ ဆိုတာ အချိန်ကြာလာတာနဲ့အမျှ ကြီးထွားလာနိုင်လို့ပါ။" မေးခဲ့တုန်းက ဘာရယ်မဟုတ်ဘူး မေးခဲ့ပေမယ့် ခုတော့ ကိုယ်တိုင်ကြုံတွေ့နေရပြီ ကိုကိုရယ်။ ကိုကိုပြောသလို ဆက်လက်ရှင်သန်ခွင့်မပေးနိုင်ပေမယ့် ဆက်လက်ချစ်နေချင်တယ်လေ....အချစ်ဆိုတာ တားလို့မှမရတာ။ ရင်တွင်းဆန္ဒကိုမျိုသိပ် ဖြစ်ချင်တာထက် ဖြစ်သင့်တာကို ဦးစားပေးပြီးမှ လူ့ပတ်ဝန်းကျင်က သတ်မှတ်တဲ့ ရင့်ကျက်မှုဆိုတဲ့ စကားလုံးလဲ မခံယူပါရစေနဲ့.... ကိုယ်ချစ်ရတဲ့ ချစ်သူကို လိုချင်လျက်နဲ့ ကြည်ကြည်ဖြူဖြူစွန့်လွှတ်လိုက်ရပေ့မယ် ချစ်ခွင့်ရနေရင်ပဲ ခရေနေပျော်ပါပြီ ကိုကို။

ခရေအဖြစ်က အချစ်လေလံ ပွဲမှာ ကိုယ့်ဘက်ကတစ်ဖက်သတ် ခေါ်ဈေး အများဆုံးနဲ့အပျက်အသတ် နိုင်ပြီးကာမှ...ပိုင်ရှင်ရဲ့ အရေးပေါ်ကြေငြာခြင်းခံလိုက်ရသလို "Not For Sale" များ ဖြစ်နေပြီလားနော်။ ဟုတ်ပါတယ်လေ ပိုင်ရှင်ကို ဘယ်ယှဉ်ပြိုင်ဝံ့ပါ့မလဲ။

ပင်မြင့်ထက်က သဇင်ပန်းကို မြေခနေရတဲ့ ခရေပန်းတစ်ပွင့်အနေနဲ့ နှိုင်းယှဉ်လိုက်ရင် ကွာဟ၊ ခြားနားလွန်လှပါတယ်။ ကလေးဆန်၊မရင့်ကျက်သေးတဲ့ ခရေကို ရင့်ကျက်အောင် သင်ပေးခဲ့တဲ့ ကိုကို့ကို အဝေးကနေပဲ ဆက်လက်ချစ်နေတော့မယ်နော်။~~~~~~~~~~~~~~

@ @ @ @ @ @

@ @ @ @ @

@ @ @ @

@ @ @

@ @

@

+++++အချိန် အတိုင်းအတာတစ်ခု ကြာပြီးချိန်မှာ တကယ်တော့ အချစ်ဆိုတာ???????+++++

စာပေချစ်သူများကို လေးစားခင်မင်လျှက်

လက်တည့်စမ်းခြင်းမျှသာ(ကိုယ်တိုင်ရေး ဝတ္တုတို)

***မင်းနေ***

***သေမယ်ဆိုတာ ကြိုသိတဲ့အခါ***

မျက်နှာအလှပြုပြင်ခွဲစိတ်ကုဆရာဝန် ဒေါက်တာ ရစ်ချတ်ဟာ အသက် ၄၀အရွယ်၊ သန်းကြွယ်သူဌေး တဦးဖြစ်ပါတယ်။ သူဟာ နောက်ဆုံးအဆင့် အဆုပ်ကင်ဆာဖြစ်ပွားနေကြောင်း သိရပြီးနောက် သူ့ရဲ့ဘ၀အကြောင်းကို ၁၉.၀၁.၁၂ နေ့မှာ သွားဆေးတက္ကသိုလ် ပထမနှစ်ကျောင်းသားများရှေ့မှာ ကိုယ်ကျိုးမငှဲ့ပဲ လူအများအတွက် တွေ့ဆုံပြောပြခဲ့ပါတယ်။

မင်္ဂလာ နံနက်ခင်းပါ။ ကျွန်တော့်အသံက နဲနဲသြနေတော့ သည်းခံပေးပါခင်ဗျာ။ ကျွန်တော်ကတော့ ရစ်ချတ်ပါ။ ဆရာဝန်ပါ။ ကျွန်တော့်ဘ၀အကြောင်း နဲနဲဝေမျှချင်ပါတယ်။ ပါမောက္ခက ကျွန်တော့်ကို ဖိတ်လို့လာရတာ ၀မ်းသာပါတယ်။ ခင်ဗျားတို့သင်ကြားနေတဲ့ သွားဆေးကုသရေးဆိုင်ရာများအပြင် တခြားအရာတွေရှိသေးတယ်ဆိုတာ တွေးမိတယ်ဆိုရင်ဖြင့် ပြောပြရကျိုးနပ်ပါတယ်ခင်ဗျာ။

ငယ်ငယ်ကတည်းက ကျွန်တော်က ဒီနေ့လူ့အဖွဲ့အစည်းရဲ့ ထုတ်ကုန်ပစ္စည်းစစ်စစ်ပါ။ အထိုက်အလျောက်အောင်မြင်တဲ့ ထုတ်ကုန်ပေါ့ခင်ဗျာ။ ငယ်ငယ်တုန်းကတော့ ဆင်းရဲတယ်ခင်ဗျ။ မီဒီယာတွေနဲ့ ပတ်ဝန်းကျင်ကလူတွေက ပြောကြတာကတော့ ပျော်ရွှင်မှုဆိုတာ အောင်မြင်မှုပဲတဲ့။ အဲဒီအောင်မြင်မှုဆိုတာလည်း ချမ်းသာမှုပဲတဲ့ခင်ဗျ။ ဒီလို အတွေးအခေါ်မျိုးနဲ့ ကျွန်တော်ဟာ ငယ်ငယ်ကတည်းက အင်မတန်ပြိုင်ဆိုင်လိုစိတ် များခဲ့တာကလား။

ကျွန်တော်ဟာ ကျောင်းမှာထိပ်ဆုံးဖြစ်ရုံသာမကသေးဘူး နယ်ပယ်အားလုံးမှာကို အောင်မြင်ဖို့လိုသေးတာ။ ၀တ်စုံဆင်တူဝတ်တဲ့အဖွဲ့တွေ၊ ပြေးပွဲပြိုင်ပွဲတွေ နေရာတိုင်းမှာ အောင်မြင်ဖို့လိုတယ်လေ။ အရောင်မျိုးစုံနဲ့ ဆုတံဆိပ်မျိုးစုံ၊ နိုင်ငံတော်ကပေးတဲ့တံဆိပ်တွေ အားလုံးလိုချင်တာပေါ့။ ဒါကြောင့်လည်း ငယ်ငယ်ကတည်းက အပြင်းအထန်ပြိုင်တတ်ခဲ့တာ။ ဆေးကျောင်းတက်ပြီး ဆရာဝန်ဖြစ်လာတယ်။ ခင်ဗျားတို့သိတဲ့အတိုင်းပဲ မျက်စိအထူးကုဖြစ်ဖို့က လူကြိတ်ကြိတ်တိုးနေတော့ အဲဒါဖြစ်အောင်လုပ်ခဲ့တယ်။ ကျွန်တော်က မျက်စိကုသရေးမှာ သင်တန်းတက်ခွင့်ရတယ်။ လေဆာနဲ့ မျက်စိကုဖို့ သုတေသန ပညာသင်ဆုကိုလည်း National University of Singapore ကပေးတယ်လေ။

ပစ္စည်းသစ်ထွင်ဖို့၊ သုတေသနလုပ်ဖို့ အခွင့်အရေးတွေလည်းရ၊ ဆေးကုသရေးပစ္စည်းတွေလည်းကိုင်ရ၊ လေဆာတွေလည်းကိုင်ရပါတယ်။ ခင်ဗျားတို့သိတဲ့အတိုင်းပဲ ဒါတွေက ပညာရပ်ပိုင်းဆိုင်ရာအောင်မြင်မှုတွေချည်းပဲဗျ။ ချမ်းသာမှု မဟုတ်သေးဘူး။ ဒါနဲ့ ကျန်းမာရေးဝန်ကြီးဌာနနဲ့ စာချုပ်ပြည့်သွားတော့ မျက်စိကုသရေးသင်တန်းဟာ သိပ်ကြာလွန်းတယ်လို့ ဆုံးဖြတ်လိုက်တယ်။ ပြီးတော့ ပုဂ္ဂလိကဆေးခန်းမှာ ၀င်ငွေကောင်းတယ်လေဗျာ။ ခင်ဗျားတို့ သတိထားမိမယ်ဆိုရင်တော့ အလှအပအတွက်ခွဲစိတ်ကုပညာဟာ လွန်ခဲ့တဲ့နှစ်တွေအတွင်းမှာ ခေတ်စားလာတာပေါ့။ ပိုက်ဆံတွေအများကြီးကိုရတာလေ။ ဒါနဲ့ကျွန်တော်လည်း ကျောင်းတက်တာတော်လောက်ပြီလို့ ဆုံးဖြတ်လိုက်တယ်။ ကျောင်းတ၀က်နဲ့ ထွက်လိုက်တယ်။ ကျွန်တော့်ကိုယ်ပိုင် အလှပြုပြင်ရေး ဆေးခန်းနဲ့ ခွဲစိတ်ကုဆေးခန်းဖွင့်တယ်ဗျ။

ဒါပေမယ့်လည်း အထွေထွေကုဆရာဝန်တွေ၊ မိသားစုဆရာဝန်တွေကို လူတွေကသိပ်အထင်မကြီးဘူးလေ။ လူတွေက ချမ်းသာတာ၊ ကျော်ကြားတာကိုမှ အထင်ကြီးတာကလား။ ရိုးရိုးဆရာဝန်ကို ဒေါ်လာ၂၀ မပေးချင်ပေမယ့် အဆီတွေကိုလျော့သွားအောင်ခွဲစိတ်ပေးတဲ့ဆရာဝန်ကိုတော့ ဒေါ်လာတသောင်းပေးဖို့ ၀န်မလေးဘူးလေ။ ရင်သားအလှခွဲစိတ်ပြုပြင်ဖို့ ဒေါ်လာတသောင်းခွဲပေးတယ်။ ဘာလို့အထွေထွေကုဆရာဝန်လုပ်နေမလဲဗျ။ ဒါနဲ့ပဲ အလှအပပြုပြင်ရေး ခွဲစိတ်ကုဆရာဝန် ဖြစ်လာတာပေါ့။  နေမကောင်းပြီး ရောဂါဖြစ်နေတဲ့လူတွေကို ကုဖို့ထက် ကျွန်တော်ဟာ နာမည်ကြီးအလှဖန်တီးရှင်ဖြစ်လာတာပေါ့။ 

 

အလုပ်ကတော့ ဖြစ်သလားမမေးနဲ့။ ပထမတော့ လူနာတွေက တပတ်စောင့်ရတယ်။ နောက်တော့ ၃ ပတ်၊ နောက် တလ၊ နှစ်လ၊ ၃ လအထိတောင်စောင့်တယ်ဗျို့။ ကျွန်တော်ကတော့ လူနာများလွန်းတော့ စိတ်ညစ်ရော။ အတော်ဘ၀င်မြင့်စရာ ကောင်းတဲ့အလုပ်ဗျ။ ကျွန်တော်မနိုင်လွန်းလို့ ဆရာဝန် ၄ ယောက်တောင် ထပ်ငှားရတယ်။ တနှစ်အတွင်းမှာကို သန်းနဲ့ချီရတာဗျ။ တနှစ်ထဲနော်။ ဒါလည်း တော်လောက်ပြီလို့ မထင်ဘူးဗျ။ စွဲနေပြီကိုး။ ဒါနဲ့ အင်ဒိုနီးရှားမှာ ဆေးခန်းထပ်ဖွင့်ပြီး အင်ဒိုနီးရှားလူချမ်းသာတွေဆီက ငွေရှာတာပေါ့။ ဘ၀ဟာ ပျော်စရာသိပ်ကောင်းဗျာ။

 

ပိုတဲ့ပိုက်ဆံတွေဘာလုပ်တယ်ထင်တုန်း။ စနေ၊ တနင်္ဂနွေအားရင် ဘာလုပ်လဲသိလား။ ကျွန်တော်က ကားကလပ်မှာ အဖွဲ့ဝင်ဗျ။ အပိုဝင်ငွေနဲ့ဝယ်ထားတဲ့ ထရပ်ကားကိုထုတ်၊ ချိန်းထားတဲ့ဆီကိုသွား၊ မလေးရှားထိအောင် ကားမောင်းပြိုင်ကြတာဗျို့။ ဒါဟာကျွန်တော့် ဘ၀ပါပဲ။ နောက်ထပ် ဖာရာရီပြိုင်ကားတစီးဝယ်ထားသေးတယ်။ အဲဒီတုန်းက မော်ဒယ် ၄၅၈ မထွက်သေးလို့ ပင့်ကူတံဆိပ် ၄၃၀ ပေါ့ဗျာ။ ကျွန်တော့်သူငယ်ချင်းဘဏ်သူဌေးကားက အနီရောင်၊ ကျွန်တော့်ကားက ငွေရောင်ဗျ။

ကားတွေရပြီးသွားတော့ဘာဖြစ်လဲ။ အိမ်ဝယ်တာပေါ့ဗျ။ ကိုယ်ပိုင်ဘန်ဂလိုတွေဆောက်ဖို့ မြေလိုက်ရှာတယ်။ ပိုက်စစ်တိုက်ရှာရတာဗျ။ ကဲ ကျွန်တော်ဘယ်လိုနေခဲ့လဲ။ ချမ်းသာမှုနဲ့ ကျော်ကြားမှုကြားမှာ နေခဲ့တာပဲ။ မယ်စကြာဝဠာ နဲ့တောင်တွဲခဲ့သေးတယ်။ လှပေ့ ချောပေ့ ချမ်းသာပေ့ ကျော်ကြားပေ့ဆိုတဲ့ သူငယ်မတွေနဲ့ပေါ့ဗျာ။ စားသောက်ဆိုင်တွေသွား၊ Michelin စားဖိုမှုးတွေချက်ကြွေးတာကိုစား၊ ပျော်စရာပေါ့ဗျာ။

လိုချင်တာတွေအကုန်လုံးပြည်စုံတဲ့ အချိန်ကိုရောက်လာတာပေါ့။ ကိုယ့်လက်ထဲမှာ အားလုံးရှိနေပြီလေ။ လွန်ခဲ့တဲ့တနှစ်လောက်က အားကစားလုပ်ရင်းနဲ့ တွေးမိတာက ကျွန်တော့်ဘ၀ကို ကျွန်တော်ကောင်းကောင်းတည်ဆောက်နိုင်ပြီလို့ ထင်ခဲ့တာ။ ထိပ်ဆုံးက ကျွန်တော်ပေါ့ဗျာ။

အင်း - ကျွန်တော်မှားသွားတာပေါ့လေ။ အားလုံးကျွန်တော့်လက်ထဲမှာမှ မဟုတ်တာပဲ။ မနှစ်က မတ်လတုန်းက ခါးနာလာတယ်ဗျ။ ထိုင်ထလုပ်တာများလို့ နာတယ်ထင်နေတာ။ ဒါနဲ့ စင်္ကာပူဆေးရုံကြီး ကိုသွားတယ်၊ ကျွန်တော့်အတန်းဖော်သူငယ်ချင်းက MRI ရုိုက်ပေးတယ်။ ဘာဖြစ်သလဲရှာဖို့ပေါ့။ ညနေလည်းကျရော သူကကျွန်တော့်ကို ခေါ်ရော။ သူက ကျွန်တော့်ခါးရိုးထဲမှာ ကင်ဆာရောက်နေတယ်တဲ့။ ကျွန်တော်မယုံဘူးဗျ။ လက်မခံနိုင်ဘူး။ တကယ်ပြောတာလားလို့ ပြန်မေးနေသေးတယ်။ အားကစားရုံမှာ ပြေးလို့ကောင်းတုန်းရှိနေသေးတာကိုး။ နောက်နေ့ကျတော့ PET scan ထပ်ရိုက်တယ်။ အဆင့်၎ ( နောက်ဆုံးအဆင့် ) အဆုပ်ကင်ဆာတဲ့ဗျာ။ ဘယ်လိုက ဘယ်လိုများရောက်လာတာလဲလို့ အံ့သြနေမိတာ။ ဦးဏှောက်၊ ခါးရိုး၊ အသည်း၊ ကျောက်ကပ်အပေါ်ပိုင်းအထိတောင်ပျံ့နေတာတဲ့။ ကျွန်တော်က အားလုံးပိုင်ဆိုင်နေပြီလို့ ထင်တဲ့အချိန်ကျမှ အားလုံးဆုံးရှူံးရတော့တာပဲဗျ။

CT scan မှာကြည့်လိုက်၊ အဆုပ်ပေါ်က အစက်အားလုံးဟာ ကင်ဆာဗျ။ ဒါကို Miliaries turmor လို့ခေါ်သဗျ။ တကယ်တော့ ကျွန်တော့်အဆုပ်ထဲမှာ သောင်းနဲ့ချီပြီးရှိနေပြီ။ ဒါကြောင့် Chemo ဆေးတွေပေးရင်တောင်မှ ၃-၄ လပဲခံတော့မှာတဲ့။ ကျွန်တော့်ဘ၀ပျက်မသွားဘူးလား။ မပျက်ပဲဘယ်ခံနိုင်ပါ့မလဲဗျာ။ စိတ်ဓါတ်ကျတယ်၊ အကြီးအကျယ်စိတ်ဓါတ်ကျတယ်၊ ကျွန်တော့်မှာအားလုံးရှိတယ်လို့ထင်ခဲ့မိတာ။

ကဲ သံမဏိကြီးလို အောင်မြင်မှုတွေနဲ့။ အိမ်ရှိတယ်၊ ကားရှိတယ်၊ အလုပ်ကောင်းကောင်းရှိတယ်၊ ဒါတွေနဲ့ ပျော်ရွှင်မှုကို ၀ယ်ခဲ့တာ။ အခုတော့ ဆိုးဆိုးရွားရွားစိတ်ဓါတ်ကျနေရပြီ။ အခုတော့ ကျွန်တော်ပိုင်တာတွေကလည်း ကျွန်တော်ပျော်အောင်လုပ်မပေးနိုင်တော့ဘူးလေ။ ဖာရီရာကားကို ကျွန်တော်ဖက်ထားရင်းအိပ်လို့ရမလား။ ဘယ်ရမလဲဗျ။ လွန်ခဲ့တဲ့ ၁၀ လအတွင်းမှာ ကျွန်တော်က အဲဒီဟာတွေအသုံးကျမယ်ထင်နေတာ။ တကယ်တော့ ကျွန်တော်ရခဲ့တာ ပျော်ရွှင်မှုအစစ်မှ မဟုတ်တာပဲကိုး။ တကယ်တမ်း ပြီးခဲ့တဲ့ ၁၀ လအတွင်းမှာ ကျွန်တော့်ကို ပျော်ရွှင်စေခဲ့တာက ချစ်တဲ့ခင်တဲ့သူတွေ၊ သူငယ်ချင်းတွေ၊ ကျွန်တော့်ကိုဂရုစိုက်တဲ့လူတွေနဲ့ အပြန်အလှန်နားလည်ပြီး ဆက်ဆံရတာမှ ပျော်စရာဗျ။ သူတို့က ကျွန်တော်နဲ့အတူ ငိုတယ်၊ ကျွန်တော်နဲ့အတူ ရယ်တယ်၊ ကျွန်တော်နာကျင်ခံစားရသလို သူတို့လဲလိုက်ပြီးခံစားနားလည်ပေးတယ်လေ။ ဒါက ကျွန်တော့်ကို ၀မ်းသာပီတိဖြစ်စေတယ်။ ပိုင်ဆိုင်မှုတွေက ဒီလိုမပေးနိုင်ပါဘူးဗျာ။ ဒီပစ္စည်းတွေကသာ လုပ်ပေးနိုင်မယ်ဆိုရင် ကျွန်တော်စိတ်ဓါတ်ကျနေတုန်းက သူတို့အကြောင်းစဉ်းစားလိုက်ရင် ပျော်လာဖို့ကောင်းတာပေါ့။

တရုတ်နှစ်သစ်ကူးကို ရောက်တော့မယ်နော်။ အရင်တုန်းက ကျွန်တော်ဘာလုပ်လဲ။ ကျွန်တော့်ကားအသစ်ကို တပတ်ပြီး တပတ်မောင်း၊ ဆွေမျိုးတွေဆီသွားလည်၊ ကျွန်တော့်သူငယ်ချင်းတွေကို ကြွား။ ဒါပျော်စရာလို့ထင်ခဲ့မိတာ။ ငွေရေးကြေးရေးသိပ်မပြေလည်တဲ့ ဆွေမျိုးတွေနဲ့ သူငယ်ချင်းတွေက ကျွန်တော်ပျော်သလိုလိုက်ပျော်မယ်ထင်လား။ ဒီလိုကားသစ်ကြီးမောင်းပြီး ကြွားနေတာကို ကူပျော်ပေးမလား။ ဘယ်ပျော်မလဲဗျ။သူတို့ဝင်ငွေနဲ့သူတို့ မနည်းလောက်အောင်သုံးပြီး မီးရထားစီးနေရတဲ့ဟာ။ ကျွန်တော်ထင်တာတော့ ကျွန်တော့်ကိုအားကျတာရယ် မနာလိုဖြစ်တာရယ်ပဲရှိမှာ။ တခါတလေတော့ မုန်းတောင်မုန်းဦးမယ်။

ဒါတွေက ကျွန်တော်တို့ထင်ထားတဲ့ အားကျမှုမျိုးပါ။ ပိုင်ဆိုင်မှုကို ကြွားတယ်ဆိုတာ ကျွန်တော့်မာနနဲ့ အတ္တကို ဖြည့်ဆည်းတာပါပဲ။ ကျွန်တော့်မှာ ထူးဆန်းတဲ့သူငယ်ချင်းတယောက်ရှိတယ်ဗျ။ သူ့နာမည်က ဂျနီဖာတဲ့။ သူငယ်ချင်းပါဗျာ။ လမ်းအတူလျှောက်သွားလို့ ခရုတကောင်တွေ့ရင် သူကကောက်ပြီးတော့ မြက်ခင်းထဲကိုချပေးတယ်ဗျ။ ဘာလို့ဒီလိုလုပ်တာလဲလို့ တွေးနေတာ။ တက်နင်းလိုက်လို့ သေသွားမှာ သူကစိုးရိမ်နေတာ။ ကျွန်တော့်အတွက်တော့ ခရုက ခရုပဲလေ။ လူတွေလဲဒီလိုပဲ။ လမ်းကြောင်းပေါ်ကနေထွက်မသွားနိုင်ရင် နင်းခံရမှာပဲလေ။ ဒါကပဲ ဖြစ်ရိုးဖြစ်စဉ်ဟုတ်ဘူးလား။ အသဲတော်တော်မာတာနော်။

ဆရာဝန်တယောက်အနေနဲ့ သနားကြင်နာဖို့၊ ကိုယ်ချင်းစာတတ်ဖို့ သင်ခဲ့ရသားပဲ။ ဒါပေမယ့် ကျွန်တော်မတတ်ခဲ့ပါဘူး။ အလုပ်သင်ဆရာဝန်ဘ၀တုန်းက National University Hospital က ကင်ဆာဌာနမှာလုပ်ရတယ်လေ။ နေ့တိုင်းနေ့တိုင်း ကင်ဆာရောဂါနဲ့ သေတာတွေတွေ့နေရပါရော။ သူတို့ဘယ်လိုခံစားရတယ်၊ ဘယ်လိုနာကျင်ဒဏ်ခံရတယ် နေ့တိုင်းတွေ့နေတာပဲ။ အောက်စီဂျင်ကို ခဲခဲယဉ်းယဉ်း နောက်ဆုံးထွက်သက်အထိရှူနေရတာ။ ဒါဟာ ကျွန်တော့်အတွက်တော့ အလုပ်တခုသာပါပဲ။ နေ့တိုင်း ဆေးရုံကိုသွား၊ သွေးဖောက်၊ ဆေးပေး လုပ်နေပေမယ့် ဒီလူနာတွေကို အစစ်လို့မထင်ပါဘူး။ ဒါဟာအလုပ်ပဲ။ ကျွန်တော့်အလုပ် ကျွန်တော်လုပ်၊ ပြီးရင်အိမ်ပြန်၊ ဒါပဲ။

ဒီလိုနာကျင်ခံစားတာတွေက အစစ်လား။ မဟုတ်ပေါင်။ ဆေးပညာအခေါ်အဝေါ်အားလုံး ကျွန်တော် သိသားပဲ။ တကယ်တော့ ကျွန်တော်လူနာမဖြစ်မချင်း ဒါတွေကိုမသိခဲ့ပါဘူး။ အခုတော့ ကျွန်တော်တကယ်သိလာပြီလေ။ အခုနေများ ခင်ဗျားတို့က ကျွန်တော်ကို အသစ်ကပြန်စခွင့်ရှိသေးရင် အချိုးပြောင်းမလားလို့မေးလာရင် ပြောင်းမယ်လို့ ပြန်ဖြေမှာပဲ။ ဘာလို့လဲဆိုတော့ အခုမှပဲ လူနာတွေ ဘယ်လိုခံစားရတယ်ဆိုတာကို နားလည်လာတာကိုး။ တခါတလေတော့ ဒီလိုပဲ ခဲရာခဲဆစ် သင်ယူရတာမျိုးရှိပါတယ်။      

အခုခင်ဗျားတို့က ပထမနှစ်ပဲရှိသေးတာ ဆိုတော့ ဒီလမ်းကြီးကို ဖြတ်ရဦးမှာပါပဲ။ ခင်ဗျားတို့ကို အချက် ၂ ချက် သတိပေးစရာရှိတယ်။

ခင်ဗျားတို့အားလုံးက ပုဂ္ဂလိကဆေးခန်းပဲလုပ်ကြရမှာပဲ။ ပြီးရင် ခင်ဗျားတို့ချမ်းသာလာကြမယ်ဆိုတာ အာမခံတယ်။ သွားစိုက်တာလေးတင် အများကြီးပိုက်ဆံရတာမို့လား။ တကယ်တော့ အောင်မြင်တယ်၊ ချမ်းသာတယ်၊ ဆိုတာတွေက မှားနေတာမဟုတ်ပါဘူး။ တကယ့်ပြသနာက ကျွန်တော်တို့အများစုက ဒီဒဏ်တွေကို မခံနိုင်တာ။

ဒါကိုကျွန်တော်ဘာလို့ပြောနိုင်လဲဆိုတော့ ပြန်စဉ်းစားကြည့်တဲ့အခါမှာ ရလေလိုလေဖြစ်နေတယ်ဆိုတာတွေ့လာတယ်လေ။ ပိုပိုပြီးလိုချင်လာတော့ မရရင် မနေနိုင်ဖြစ်ရော။ ပြောခဲ့ပြီးတဲ့အတိုင်း ကျွန်တော်က ဒီလူမှုပတ်ဝန်းကျင်က သတ်မှတ်ထားတာအားလုံးရခဲ့သားပဲ။ မရရင် မနေနိုင်ဖြစ်ခဲ့တယ်။ လူနာဆိုတာ ငွေဝင်လမ်းလို့ပဲ မြင်ခဲ့တာ။ လူနာဆီက ရသမျှပိုက်ဆံညှစ်ယူခဲ့တယ်လေ။

အချိန်တော်တော်များများမှာ ကျွန်တော်တို့ တကယ်တမ်းဘယ်သူ့အတွက် လုပ်ပေးနေတာလဲဆိုတာ မေ့နေကြတယ်။ နောက်ဆုံးမှာ ဘယ်သူ့အတွက်မှ မဟုတ်ပဲ ကိုယ့်အတွက်တွေဖြစ်ကုန်ရော။ ဒါဟာ ကျွန်တော်တကယ်ဖြစ်ခဲ့တာပဲ။ ဒါဟာ ဆေးပညာပဲဖြစ်ဖြစ်၊ သွားဆေးကုပဲဖြစ်ဖြစ်၊ ပုဂ္ဂလိကဆေးခန်းမှာ လူနာကို မလိုတဲ့ကုသမှုတွေ ပေးကြတယ်။ သိပ်မသေချာတဲ့အခါမျိုးမှာပေါ့။  မလိုအပ်မှန်းသိတာတောင်မှ ပေးဖြစ်အောင်ပေးသေးတာ။ ဒီအချိန်မှာတော့ ကျွန်တော်သိလာတာက သူငယ်ချင်းတွေထဲက တကယ်ဂရုစိုက်တဲ့လူနဲ့ ပိုက်ဆံလိုချင်လို့ မျှော်လင့်ချက်ပေးတဲ့လူနဲ့ကို ခွဲတတ်လာပြီ။ ပိုက်ဆံကြောင့် စိတ်ဓါတ်တွေ ပျက်စီးလာတာပေါ့။

ပိုဆိုးတာကတော့ ပြီးခဲ့တဲ့နှစ်တွေအတွင်းမှာ ကျွန်တော်တို့ဟာ လုပ်ဖော်ကိုင်ဖက်တွေအကြောင်း၊ ပြိုင်ဘက်တွေအကြောင်းကို ဆိုးဆိုးရွားရွားပြောခဲ့ကြတယ်လေ။ လိပ်ပြာမသန့်တာလေးတောင် မဖြစ်ပေါင်။ ကျွန်တော်တို့ဟာ သူများကိုနှိမ့်ချပြီး အပေါ်ရောက်ဖို့လုပ်ခဲ့ကြတယ်။ ဒါကနေရာအားလုံးမှာကို ဖြစ်နေတာ။ ခင်ဗျားတို့ကို သတိပေးချင်တာက ဒီလိုစိတ်ကောင်းနှလုံးကောင်းတွေ ပျက်စီးသွားတာမျိုးကိုတော့ မဖြစ်ပါစေနဲ့ဗျာ။ ကျွန်တော်ကဒါကို ခဲရာခဲဆစ်သင်ခဲ့ရတာမို့ပါ။ ခင်ဗျားတို့ကိုတော့ ကျွန်တော့်လို မဖြစ်စေချင်ပါဘူး။

နောက်တခုက လုပ်သက်ရှည်လာတာနဲ့အမျှ ကျွန်တော်တို့ရဲ့ လူနာတွေအပေါ်မှာ သိပ်အရေးမလုပ်တော့ဘူးလေ။ ထုံပေပေဖြစ်လာတယ်။ အစိုးရဆေးရုံဖြစ်ဖြစ်၊ ပုဂ္ဂ္ဂလိကဆေးခန်းပဲဖြစ်ဖြစ် လူနာမှတ်တမ်းတထပ်ကြီး လက်ထဲရောက်နေတာနဲ့ အဲဒီဟာကြီးမြန်မြန်ကုန်သွားဖို့ပဲ အရေးကြီးနေတော့တာပဲလေ။ လူနာတွေများလွန်းလို့ အခန်းထဲက မြန်မြန်ထွက်သွားဖို့ပဲ အာရုံရှိတော့တာ။ ဒါအမှန်ပဲဗျ။ ဒါက နေ့တဓူဝ အလုပ်ဖြစ်လာတော့ ငြီးငွေ့လာတာပေါ့ဗျာ။ လူနာတွေဘက်က ဘယ်လိုစိတ်ထဲမှာထင်သွားလဲ ကျွန်တော်မသိပါဘူး။ ကြောက်ရွံ့တာ၊ စိုးရိမ်တာ အားလုံးပေါ့ဗျာ။ ကျွန်တော်ကိုယ်တိုင်တကယ်ခံစားရတဲ့အချိန်ရောက်မှ သိလာတာဗျ။ ဒါဟာကျွန်တော်တို့ရဲ့ အကြီးဆုံးချွတ်ယွင်းချက်ပါပဲဗျာ။

ကျွန်တော်တို့ဟာ ကျန်းမာရေးဝန်ထမ်းများ၊ ပညာရှင်များအနေနဲ့ လေ့ကျင့်ပေးထားခဲ့ပေမယ့် တကယ်တမ်းလူနာတွေခံစားနေရတာကိုတော့ ကိုယ်ချင်းမစာနိုင်ခဲ့ပါဘူး။ စိတ်ဆင်းရဲလိုက်၊ ၀မ်းနည်း ၀မ်းသာလိုက်ဖြစ်နေဖို့ပြောတာမဟုတ်ပါဘူး။ ခံစားမှုကဲလွန်းရင် Professional မဆန်ဘူးဗျ။ ဒါပေမယ့် ကျွန်တော်တို့တကယ်တမ်း သူတို့ကိုနားလည်အောင်ကြိုးစားသလား။ အများအားဖြင့်တော့ မကြိုးစားဘူးဗျ။ ခင်ဗျားတို့ကို သတိပေးချင်တာကတော့ လူနာတွေကို ကိုယ်ချင်းစာပါဗျာ။

ဘာလို့လဲဆိုတော့ နာကျင်တာတွေ၊ ကြောက်ရွံ့တာတွေ၊ စိုးရိမ်တာတွေက ကျွန်တော်တို့အတွက် အစစ်မဟုတ်ပေမယ့် သူတို့အတွက်တော့ အစစ်တွေကိုးဗျ။ ကျွန်တော်က အခုဆိုရင် Chemotherapy ယူနေတာ ၅ ခါရှိပြီ။ ဒါဟာ သိပ်ခံရခက်တာပဲဗျာ။ Chemotherapy ဆိုတာ ခင်ဗျားတို့ရဲ့ရန်သူအတွက်တောင် ဆုမတောင်းသင့်ဘူး။ တကယ့်ကို ခံစားရတာဗျာ။ အစာစားမိလား မစားမိလားတောင်မသိတော့ပါဘူး။ သိပ်ကိုဆိုးပါတယ်။ ကျွန်တော်နဲနဲအင်အားရှိတာနဲ့ တခြားကင်ဆာလူနာတွေဆီကို သွားပါတယ်။ နာကျင်တာတွေကို သိလာပြီကိုး။ ဒါက သိပ်နောက်ကျပြီး လုပ်ပေးနိုင်တာလဲ သိပ်နဲနေပါပြီလေ။

ခင်ဗျားတို့မှာက တောက်ပတဲ့အနာဂတ်နဲ့ ခွန်အားအပြည့်နဲ့။ ကျွန်တော်ပြောချင်တာက ခင်ဗျားတို့ လူနာအကြောင်းကိုထဲထဲဝင်ဝင်သိအောင်လုပ်ပါဗျာ။ သူတို့ဟာလူသားစစ်စစ်တွေ၊ အမှန်တကယ်ကို နာကျင်ခံစားပြီး အခက်ခဲဆုံးအချိန်တွေကို ရောက်နေတယ်ဆိုတာကို သိအောင်လုပ်ပါ။ ဆင်းရဲတဲ့လူတွေပဲ ခံစားရတယ်လို့ မထင်ပါနဲ့ဗျာ။ ဆင်းရဲတဲ့လူတွေက အစကထဲကသူတို့မှာ နဲနဲပဲရှိတော့ ရောင့်ရဲလွယ်တယ်ဗျ။ ကျွန်တော်တို့၊ ခင်ဗျားတို့ထက်လည်း ပိုပြီးပျော်ပျော်နေနိုင်ကြတယ်။ တခြားစိတ်ပိုင်းဆိုင်ရာ၊ ရုပ်ပိုင်းဆိုင်ရာ၊ ခံစားချက်ပြင်းထန်နေတာ၊ ငွေရေးကြေးရေး စတဲ့ပြသနာနဲ့ လူတွေအများကြီး။ ဒါတွေကလည်းတကယ်ရှိတာ။ ကျွန်တော်တို့က မသိချင်ယောင်ဆောင်၊ အသိအမှတ်မပြုပဲ နေခဲ့ကြတာ။

ဒါကြောင့်မို့ တကယ်လိုအပ်နေတဲ့လူတွေအပေါ်မှာ အလေးထားကြပါဗျာ။ ခင်ဗျားနဲနဲလေးလုပ်ပေးလိုက်တာ သူတို့အတွက်အများကြီးကို ထူးခြားသွားတာပါ။ ကျွန်တော်ကတော့ သေခါနီးနေပြီဆိုတော့ ဘယ်သူကတကယ်ဂရုစိုက်တယ်၊ အားပေးတယ်ဆိုတာကို ခံစားတတ်နေပြီလေ။ ဒါဟာ ကျွန်တော့်ကို တကယ်ပြောင်းလဲသွားစေတယ်။ ဒါဟာကုသမှုတွေယူပြီးတဲ့နောက်သိလာတာပါ။ ကျွန်တော်ဆေးသွင်းထားတာ မကြာသေးဘူး။ နောက်နေ့မှ ဆေးထပ်သွင်းမယ်ဗျာ။ ဒါကြောင့် ကျွန်တော်ခင်ဗျားတို့ကို စကားပြောဖို့ အားရှိနေသေးတာပေါ့။

မောရစ် နဲ့ အင်္ဂါနေ့ ဆိုတဲ့စာအုပ်ထဲက စကားလုံးလေးတွေ ပြောပြချင်တယ်။ ခင်ဗျားတို့ဖတ်ပြီးသားလဲဖြစ်ချင်ဖြစ်မှာပါ။ လူတိုင်းသေရမှာသိတာပဲ။ ဒါပေမယ့် ဘယ်သူမှ မယုံကြဘူး။ တကယ်ယုံတယ်ဆိုရင် လုပ်ပုံကိုင်ပုံတွေကို ပြောင်းပစ်ကြမှာပဲ။ ကျွန်တော်သေရတော့မယ်ဆိုတာသိတော့ ကျန်တာအကုန်လုံးမေ့ထားပြီး တကယ်လိုအပ်တာတွေပဲ စဉ်းစားတယ်။ တကယ်တော့ သေခါနီးမှပဲ ဘယ်လိုနေရမှန်း သိတော့တယ် ဆိုပါတော့ဗျာ။ ဒါမျိုးကို မနက်စောစောစီးစီးကြားရတာ ကျက်သရေတော့ မရှိဘူးပေါ့လေ။ ဒါပေမယ့် ကျွန်တော်သိခဲ့တဲ့အမှန်တရားမို့ ပြောပြတာပါ။

ခင်ဗျားတို့ကို ပတ်ဝန်းကျင်က ပြောတဲ့အတိုင်းမနေကြပါနဲ့။ မီဒီယာပြောတာကိုလည်း လက်မခံနဲ့။ ကျွန်တော်ခံခဲ့ရပြီးပြီ။ ပျော်မယ်ထင်လို့ သူတို့ပြောတဲ့အတိုင်းလုပ်ခဲ့မိပြီ။ ခင်ဗျားတို့ သေချာစဉ်းစားပြီး ဘယ်လိုအသက်ရှင်သန်မယ်ဆိုတာ ဆုံးဖြတ်ပါ။ သူများပြောတိုင်းလိုက်မလုပ်နဲ့။ ကိုယ့်တကိုယ်ရည်စာပဲကြည့်နေမလား။ တခြားတယောက်ဘ၀ကို ပြောင်းလဲသွားအောင်ကူညီမလား။ ဆုံးဖြတ်ပါ။ တကယ့်ပျော်ရွှင်မှုအစစ်ဆိုတာ ကိုယ့်အတွက်ချည်းပဲကြည့်နေလို့မရပါဘူး။ ကျွန်တော်ရနိုင်မယ်လို့ထင်ခဲ့တာ မရခဲ့ပါဘူး။ နားထောင်ပေးတာကျေးဇူးပါပဲ။ မေးချင်တာရှိရင် မေးနိုင်ပါတယ်ခင်ဗျာ။

( ဒေါက်တာရစ်ချတ်ဟာ ၁၈.၁၀.၁၂ နေ့မှာ ကွယ်လွန်ခဲ့ပါတယ်။ )

မူရင်း။ ။Facebookမှာတွေ့လို့ သူငယ်ချင်းတွေ အတွက် ပြန်ရှယ်ပေးလိုက်တာပါ....

သူငယ်ချင်းများကို လေးစားခင်မင်လျှက်

***မင်းနေ***

+++ဖြူစင်ချစ်ခြင်းဆောင်နှင်းမိလေတော့...+++

ကိုကို..
အချစ်ဆိုတာရယူခြင်းလား
ပေးဆပ်ခြင်းလား
ညီမလေးရေရေရာရာမသိပေမယ့်
ကိုကို့ အချစ်တွေမှာငြိတွယ်နေမိတာကတော့
သေချာနေခဲ့ပါတယ်ကိုကို..။

ကိုကိုကမေးတယ်နော်..
"ကိုကို့ ကိုသတိရလား" တဲ့..
သတိရတယ်ဆိုတာထက်
ပိုမိုလေးနက်လှိုက်မောတဲ့သတိရခြင်းတွေ
အချိန်တိုင်းလိုလိုဖြစ်တည်နေတယ်ဆိုတာ
ညီမလေးမငြင်းချင်ပါဘူးကိုကို..။

ကိုကို့ကိုချစ်မိတာ..
ရူးသွပ်တယ်ပဲဆိုချင်ဆို
မိုက်မဲတယ်ပဲပြောချင်ပြော..
ညီမလေးကိုယ်တိုင်ကိုက
ကိုကို့ နှလုံးသားပစ်ကွင်းထဲတိုးဝင်ချင်နေတဲ့
သားကောင်သက်သက်လေ...။
(ဒီ့အတွက်ကိုကို့ နာကျင်စေခဲ့မယ်ဆိုတာ...မတွေးမိခဲ့ရိုးအမှန်ပါ)

တကယ်တော့ ညီမလေးက
ပိုးဖလံတစ်ကောင်ရဲ့အသိမရှိတဲ့ဦးနှောက်နဲ့ 
ကိုကို့ ဘ၀ထဲကိုဝင်လာခဲ့မိတာပါ...
ဒါပေမယ့်ကိုကိုရယ်..
ချစ်တာအပြစ်လားနော်..။
(ဒီ့အတွက်ကိုကိုညီမလေးကိုအပြစ်တင်ချင်နေလားဟင်..။)

အရိုးသားဆုံးဝန်ခံရရင်..
ပကတိတန်ဖိုးတွေနဲ့ထုံမွှမ်းထားတဲ့
ရင်ခုန်သံနဲ့ကိုကို့ကိုငြိတွယ်မိခဲ့တာပါကိုကို..
ခုလိုချစ်နေခွင့်ရနေတာလေးကိုပဲကျေနပ်နေမိတာပါ
ကိုကို့ ဘ၀ရဲ့အစိတ်လေးအပိုင်းလေးတစ်ခုအဖြစ်
ပါဝင်ခွင့်ရလို့  ပျော်ရွှင်နေမိတာပါ...။

ကိုကို..
ဘ၀ဆိုတဲ့ဒိုင်ယာရီမှာ
စာမျက်နှာတစ်ခုဖွဲ့ ဆိုကြေးဆိုရင်
အဲဒီစာမျက်နှာရဲ့ထိပ်ဆုံးမှာ..
ကိုကိုပါဝင်နေမှာပါနော်..။
ဒါလေးကိုတော့ယုံကြည်ပေးပါ..

လွမ်းတယ်ကိုကိုရယ်..
လွမ်းနေမိတယ်လေ...
ဆုတောင်းတိုင်းသာပြည့်မယ်ဆိုရင်
ရင်နှင့်ရင်းတဲ့ဒီစကားလေးတွေကို..
ကိုကိုနားလည်နိုင်ပါစေနော်..။


{အရမ်းချစ်တတ်တဲ့ကောင်မလေးပဲ :-) }
***မင်းနေ***

+++ရွက်ကြွေ ဘဝ+++

နှင်းစက် နားခိုဖို့
ကြွေပေး ရတာထက်စာရင်
ရိုးတံ နာလို့
ကြွေရတာမှ ခံသာအုံးမယ်.........


***မင်းနေ***
01.11.12(04:25PM)